حضرت مسیح موعود علیہ السلام نے اپنے مکتوب میں حضرت ڈاکٹر میر محمد اسماعیل صاحبؓ کو سیّدہ شوکت سلطانہ صاحبہ کے رشتہ کے متعلق تحریر فرمایا:
’’ میرے نزدیک اور میری رائے میں اس رشتہ کو مبارک سمجھو اور اس کو قبول کرلو اور اگر تم نے ایسا کیا تو مَیں بھی تمہارے لیے دعا کروں گا۔“
(سیرت المہدی جلد اوّل روایت809 صفحہ 737از حضرت مرزا بشیر احمدؓ )
حضرت سیّد بیگم صاحبہؓ کے اخلاص اور سیرت کے متعلق حضرت میر ناصر نواب صاحب فرماتے ہیں کہ
’’اس با برکت بیوی نے جس سے میرا پالا پڑا تھا مجھے بہت ہی آرام دیا اور نہا یت ہی وفاداری سے میرے ساتھ اوقات بسری کی اور ہمیشہ نیک صلاح دیتی رہی، کبھی مجھ پر ناجا ئز دباؤ نہیں ڈالا ،نہ میری طاقت سے بڑھ کر تکلیف دی۔ میرے بچو ں کو بہت ہی شفقت اور جانفشانی سے پالا۔ نہ کبھی بچوں کو کوسا نہ مارا۔ اللہ تعالیٰ اسے دین ودنیا میں سرخرو رکھے اور بعد انتقال جنت الفردوس میں جگہ عنایت فرماوے۔ بہرحال عُسر اور یُسر میں میراساتھ دیا۔ جس کو میں نے مانا اس کو اس نے مانا۔ جس کو مَیں نے پیر بنایا اس نے بھی اس سے بلا تامل بیعت کی۔ چنانچہ عبد اللہ صاحب غزنوی کی میرے ساتھ بیعت کی۔ نیز مرزا صاحبؑ کو جب مَیں نے تسلیم کیا تو اس نے بھی مان لیا۔ ایسی بیویاں بھی دنیا میں کم نظر آتی ہیں۔ یہ بھی میری ایک خوش نصیبی ہے جس کا مَیں شکر گزار ہو ں۔ کئی لوگ بسبب دینی اور دنیوی اختلاف کے بیویوں کے ہاتھ سے نالاں پائے جاتے ہیں جو گویا کہ دنیا کی دوزخ میں داخل ہو جاتے ہیں۔ مَیں تو اپنی بیوی کے نیک سلوک سے دنیا میں ہی جنت میں ہوں۔ ذٰلِکَ فَضۡلُ اللّٰہِ یُؤۡ تِیۡہِ مَنۡ یَّشَآءُ وَاللّٰہُ ذُوالۡفَضۡلِ الۡعَظِیۡمِ۔‘‘( الحدید: 22)
مکرم سیّد داؤد مظفر شاہ صاحب کے تلاوتِ قرآن کے بارے میں حضور انور ایدہ اللہ تعالیٰ نے اپنے خطبہ جمعہ میں بیان فرمایا کہ
’’ قرآنِ کریم سے بھی اُن کوایک عشق تھا۔ روزانہ کئی سپارے پڑھ جاتے تھے۔پانچ چھ سپارے کم از کم، بلکہ بعض دفعہ سات آٹھ اور اس وجہ سے ایک بڑا حصہ یاد بھی تھا۔‘‘
(خطبہ جمعہ بیان فرمودہ11مارچ2011ء )
حضرت خلیفۃ المسیح الخامس ایدہ اللہ تعالیٰ جب منصبِ خلافت پر متمکن ہوئے تو کسی نے باتوں باتوں میں صاحبزادی محمودہ بیگم صاحبہ سے پوچھا کہ یہ تو آپ کی عمر کے لحاظ سے بہت ہی چھوٹے ہیں اب اِن کو خط میں کیسے مخاطب کریں گی؟ تو فرمانے لگیں کہ مَیں لکھوں گی:
” میرے پیارے سیدی بیٹے!“
حضرت خلیفۃ المسیح الرابع رحمہ اللہ تعالیٰ نےصاحبزادہ ڈاکٹر مرزا منور احمدصاحب کے بارہ میں فرمایا کہ
’’ ایسی حیرت انگیز محبت اِن کو خلافت سے تھی اور اس کا احترام ملحوظ تھا کہ جب وہ ملتے تھے تو جس محبت اور خلوص سے ملتے تھے مَیں شرم سے پانی پانی ہو جاتا تھا ۔ بعض دفعہ طبیعت پر بوجھ ہوتا تھا کہ اب یہ سب کے سامنے آکر اس طرح اظہار کریں گے تو میرا کیا حال ہو گا ۔ بڑے بھائی تھے اور اس سے پہلے زندگی میں وہ ناراض بھی ہوا کرتے تھے ۔ ان کا بالکل ایک اور رنگ کا تعلق تھا لیکن جب سے خدا تعالیٰ نے خلافت کا منصب عطا کیا اُن کی کیفیت ہی بدل گئی اور سب بھائیوں میں مَیں نے اس پہلو سے سب سے زیادہ اُن میں امتیاز دیکھا ہے ۔ ایک غیر معمولی امتیازی شان پائی ہے ۔‘‘
( ہفت روزہ بدر قادیان 25اکتوبر 1990ء )
حضرت مسیح موعود علیہ السلام نے روزہ کی توفیق چاہنے کے لئے دعا کی تلقین کرتے ہوئے فرمایا۔
”ہر شے خدا تعالیٰ ہی سے طلب کرنی چاہئے۔ خداتعالیٰ تو قادرِ مطلق ہے وہ اگر چاہے تو ایک مدقُوق کو بھی روزہ کی طاقت عطاکرسکتا ہے… پس میرے نزدیک خوب ہے کہ (انسان) دعا کرے۔ کہ الہی! یہ تیرا ایک مبارک مہینہ ہے اور مَیں اس سے محروم رہا جاتا ہوں اور کیا معلوم کہ آئندہ سال زندہ رہوں یا نہ یا اِن فوت شدہ روزوں کو اداکرسکوں یا نہ اور اس سے توفیق طلب کرے تو مجھے یقین ہے کہ ایسے دل کو خداتعالیٰ طاقت بخش دے گا۔“
(ملفوظات جلد دوم صفحہ563)
حضرت مسیح موعود علیہ السلام فرماتے ہیں :
رات کے آخری پہر میں اُٹھو اور وضوکرو اور چند دوگانہ اخلاص سے بجالاؤ اور دردمندی اور عاجزی سے یہ دعا کرو۔
”اے میرے محسن اور میرے خدا! مَیں ایک تیرا ناکارہ بندہ پُرمعصیت اور پُر غفلت ہوں۔ تو نے مجھ سے ظلم پر ظلم دیکھا اور انعام پرانعام کیا اور گناہ پر گناہ دیکھا اور احسان پر احسان کیا۔ تو نے ہمیشہ میری پردہ پوشی کی اور اپنی بے شمار نعمتوں سے مجھے متمتع کیا۔ سو اب بھی مجھ نالائق اور پرگناہ پر رحم کر اور میری بے باکی اور ناسپاسی کو معاف فرما اور مجھ کو میرے اس غم سے نجات بخش کہ بجز تیرے اورکوئی چارہ گر نہیں۔آمین! ثم آمین۔“
(مکتوبات احمدیہ جلد5مکتوب نمبر2صفحہ3)
حضرت مسیح موعود علیہ السلام کی مصائب ومشکلات، گناہوں اور غم سے نجات کی ایک دعا
”اے ہمارے ربّ! ہمارے گناہ بخش دے اور ہماری مصیبتیں اور تکلیفیں دور کردے اور ہمارے دلوں کو ہر غم سے نجات دے اور ہمارے معاملات خود سنبھال لے اور اے ہمارے محبوب! ہم جہاں بھی ہوں تو ہمارے ساتھ ہو اور ہماری کمزوریاں ڈھانپ دے اور ہمارے خوفوں سے امن دے۔ہم نے تجھ پر توکل کیا اور اپنا معاملہ تیرے سپرد کیا۔اس دنیا میں اور آخرت میں تو ہی ہمارا مولیٰ ہے اور تو ہی سب سے بڑھ کر رحم کرنے والا ہے۔اے رب العالمین! قبول فرمالے۔“
(تحفہ گولڑویہ، روحانی خزائن جلد17صفحہ 182)
حضرت مسیح موعود علیہ السلام اللہ کے حضور عرض کرتے ہیں۔
”میں گنہگار ہوں اور کمزورہوں تیری دستگیری اور فضل کے سوا کچھ نہیں ہوسکتا تو آپ رحم فرما مجھے پاک کر کیونکہ تیرے فضل وکرم کے سوا کوئی اور نہیں جو مجھے پاک.کرے۔“
(البدر جلد3صفحہ41)
اضافہ علم ومعرفت کے لئے 7جون 1906ء کو یہ دعا حضرت مسیح موعود علیہ السلام کو الہام ہوئی۔
رَبِّ اَرِنِیْ اَنوَارَکَ الکُلِیَّۃَ
کہ اے میرے رب! مجھے اپنے وہ انوار دکھا۔ جو محیط کل ہوں۔
(تذکرہ صفحہ534)
