مشاہدات

حضرت مسیح موعود علیہ السلام نے ایک دن کو جو ہزار سال کے برابر قرار دیا گیا ہے ۔ اس کے متعلق فرماتے ہیں :
” ایک دن خدا کے نزدیک تمہارے ہزار سال کے برابر ہے پس جب خداتعالیٰ کی کلام سے معلوم ہوتا ہے کہ دن سات ہیں پس اس سے یہ اشارہ نکلتا ہے کہ انسانی نسل کی عمر سات ہزار سال ہے جیساکہ خدا نے میرے پر ظاہر کیا ہے کہ سورۃ العصر کے عدد جس قدر حساب جمل کی روسے معلوم ہوتے ہیں اسی قدر زمانہ نسلِ انسان کا آنحضرت صلی اللہ علیہ وسلم کے عہدِ مبارک تک بحساب قمری گزر چکا تھا کیونکہ خدا نے حساب قمری رکھا ہے اور اس حساب سے ہماری اس وقت تک نسلِ انسانی کی عمر چھ ہزار برس تک ختم ہوچکی ہے اور اب ہم ساتویں ہزار میں ہیں اور یہ ضرور تھا کہ مثیلِ آدم جس کو دوسرے لفظوں میں مسیح موعود کہتے ہیں چھٹے ہزار کے آخر میں پیدا ہو جو جمعہ کے دن کے قائم مقام ہے جس میں آدم پیدا ہوا اور ایسا ہی خدا نے مجھے پیدا کیا پس اس کے مطابق چھٹے ہزار میں میری پیدائش ہوئی اور یہ عجیب اتفاق ہوا کہ میں معمولی دنوں کی رو سے بھی جمعہ کے دن پیدا ہواتھا۔“
( حقیقۃ الوحی ، روحانی خزائن جلد 22صفحہ 457-458)

حضرت مسیح موعودعلیہ السلام نے سورۃ البقرہ آیت 262 کی تفسیر میں فرماتے ہیں :
” یعنی خدا کی راہ میں جو لوگ مال خرچ کرتے ہیں، ان کے مالوں میں خدا اس طرح برکت دیتا ہے کہ جیسے ایک دانہ جب بویا جاتا ہے تو گووہ ایک ہی ہوتا ہے، مگر خدا اس میں سے سات خوشے نکال سکتا ہے اور ہر ایک خوشے میں سو دانے پیدا کر سکتا ہے۔ یعنی اصل چیز سے زیادہ کر دینا یہ خدا کی قدرت میں داخل ہے اور درحقیقت ہم تمام لوگ خدا کی اسی قدرت سے ہی زندہ ہیں۔ اگر خدا اپنی طرف سے کسی چیز کو زیادہ کرنے پر قادر نہ ہوتا تو تمام دنیا ہلاک ہو جاتی اور ایک جاندار بھی روئے زمین پر باقی نہ.رہتا۔“
(چشمہ معرفت، روحانی خزائن جلد 23 صفحہ 170۔ 171)

حضرت خلیفۃ المسیح الثانی رضی اللہ عنہ نے سورۃ العنکبوت آیت 15کے حوالہ سے فرمایا :
” اِس آیت میں جو یہ ذکر آتا ہے کہ لَبِثَ فِیۡہِمۡ اَلۡفَ سَنَۃٍ اِلَّا خَمۡسِیۡنَ عَامًا۔ نوحؑ اپنی قوم میں ساڑھے نو سو سال رہے۔ اس کے یہ معنی نہیں کہ حضرت نوح ؑ کی عمر ساڑھے نو سو سال تھی بلکہ اِس رہنے کے معنی روحانی رہنے کے ہیں یعنی نوح ؑ کی تعلیم اپنی قوم میں ساڑھے نَو سو سال تک رہی پھر مٹ گئی۔“
( تفسیر کبیر جلد 7صفحہ 601 )

حضرت مسیح موعود علیہ السلام فرماتے ہیں:
’’عاجزی کو اپنا شعار بنا لو اور رونے کی عادت ڈالو کیونکہ رونا اسے بہت پسند ہے اگر 40 دن تک رونا نہ آئے تو سمجھ لو دل سخت ہو گیا ہے۔‘‘
(ملفوظات جلد5 صفحہ132)

حضرت خلیفۃ المسیح الاوّل رضی اللہ عنہ سورۃ الاعراف آیت 161 کی تفسیر میں فرماتے ہیں:
’’ ہم نے بنی اسرائیل سے وعدہ لیا تھا اور ان میں 12 سردار بنائے ۔ چھاؤنیوں کو اب تک بارہ پتھر کہتے ہیں۔ حضرت مسیح علیہ السلام نےبھی بارہ حواری بنائے۔ ہمارے نبی کریم صلی اللہ علیہ وسلم نے فرمایا کہ بارہ شخص قریشی بڑے خلیفہ ہوں گے ۔ ‘‘
(حقائق الفرقان جلد دوم صفحہ 86 )

حضرت خلیفۃ المسیح الاوّل رضی اللہ عنہ فرماتے ہیں :
”چالیس کے عدد سے انسان کو ایک مناسبت ہے۔ نُطفہ چالیس دن میں صورتِ انسان اختیار کرتا ہے۔ 40 دن کے بعد اُس کی ماں تندرست ہوتی ہے۔ 40 سال پر آدمی.کے تمام قویٰ کمال کو پہنچتے ہیں ۔ خدا نے موسیٰ ؑ سے فرمایا ۔ روحانی برکات کے حصول کے لئے 30 دن ہماری طرف تبتّل قائم کرو اور اگر 10 دن اَور رہو تو یہ درجہ اکمل ہے۔“
( حقائق الفرقان جلد 2 صفحہ 230)

حضرت خلیفۃ المسیح الاوّل رضی اللہ عنہ فرماتے ہیں:
” اللہ تعالیٰ نے ہماری طرف بھی ایک موسیٰ ( حضرت سیّدنا محمد علیہ الصلوٰۃ والسلام ) تِسۡعَ اٰیٰتٍ کے ساتھ بھیجا ۔ پس جو ان کے خلاف کرتا ہے وہ بھی فرعون کی طرح مثبور یعنی رسومات اور عادات میں محبوس ہے۔ شرک مت کرنا، ناجائز روپیہ نہ کماؤ ، نہ ناجائز طور پر خرچ کرو، زنا نہ کرو، جھوٹ نہ بولو، کسی کو دُکھ نہ دو، قتل نہ کرو ۔ اکڑ بازی سے نہ چلو ، کسی کو بے جا گالی مت دو۔ مقابلہ کے وقت مت بھاگو ، بیاج نہ کھاؤ …غضب ، رسوم، عادات کی پابندی چھوڑ دو۔ حرص میں نہ بڑھو ۔ غفلت نہ کرو ۔ علم حاصل کرو تو اس پر عمل بھی کرو ۔ اپنی جانوں پر رحم کرو۔ آئندہ آنے والی قومیں تمہارا نمونہ پکڑیں گے۔ پس تمہارا فرض نازک ہے۔“
( حقائق الفرقان جلد 2 صفحہ 573)

حضرت مصلح موعود رضی اللہ عنہ جہنم کے سات دروازوں کی تفسیر میں فرماتے ہیں:
” یہ جو سات دروازے بتائے ہیں ان سے مراد ضروری نہیں کہ سات ہی دروازے ہوں کیونکہ سات اور ستّر کا ہندسہ عربوں میں تکمیل یا کثرت کے اظہار کے لئے استعمال ہوتا ہے۔ اس محاورہ کی رُو سے دوزخ کے سات دروازوں سے یہ مراد ہے کہ اس کے کثرت سے دروازے ہوں گے۔“
(تفسیر کبیر جلد 4 صفحہ81)

حضرت مسیح موعودعلیہ السلام فرماتے ہیں:
” خدا تعالیٰ نے جو کچھ زمین میں ہے سب پیدا کرکے اور آسمان کو بھی سات طبقے بنا کر غرض اس عالَم کی پیدائش سے بکلّی فراغت پاکر پھر چاہا کہ آدم کو پیدا کرے۔ پس اُس نے اُس کو روزِ ششم یعنی جمعہ کے آخری حصّہ میں پیدا کیا کیونکہ جو چیزیں از روئے نصِّ قرآنی چھٹے دن پیدا ہوئی تھیں۔ آدم اُن سب کے بعد میں پیدا کیا گیا اور اس پر دلیل یہ ہے کہ سورۃ حٰمّ السجدہ جزو چوبیس میں اس بات کی تصریح ہے کہ خدا نے جمعرات اور جمعہ کے دن سات آسمان بنائے اور ہر ایک آسمان کے ساکن کو جو اس آسمان میں رہتا تھا اس آسمان کے متعلق جو امر تھا وہ اس کو سمجھا دیا اور ورلے آسمان کو ستاروں کی قندیلیوں سے سجایا اور نیز اُن ستاروں کو اس لئے پیدا کیا کہ بہت سے امورحفاظت دنیا کے ان پر موقوف تھے۔ یہ اندازے اُس خدا کے باندھے ہوئے ہیں جو زبردست اور دانا ہے۔“
(تحفہ گولڑویہ از روحانی خزائن جلد17 صفحہ 277۔278 حاشیہ )

پَروں سے مراد اللہ کی صفات ہیں ۔ حضرت خلیفۃ المسیح الثانی رضی اللہ عنہ نے لکھا ہے کہ :
”اب اِس رسول (حضرت محمدؐ) پر ایسے فرشتے نازل ہوں گے جو خداتعالیٰ کی کئی کئی صفات کے حامل ہوں گے۔ دو دو صفات کے، تین تین کے اور چار چار کے۔ مگر اِن پر ہی بس نہیں ۔ خداتعالیٰ چاہے گا تو قرآنی وحی لانے والے فرشتوں کے پَروں یعنی صفات الٰہیہ کو جس کے وہ ظاہر کرنے والے ہو گے، بڑھا دے گا۔“
( فٹ نوٹ زیر آیت 2 الفاطر)