Author: S Ahmed

حضرت ابو مسعود غفاری ؓ بیان کرتے ہیں کہ مَیں نے رمضان شروع ہونے کے بعد ایک روز آنحضور صلی اللہ علیہ وسلم کو یہ فرماتے ہوئے سنا کہ اگر لوگوں کو رمضان کی فضیلت کا علم ہوتا تو میری اُمّت اس بات کی خواہش کرتی کہ سارا سال ہی رمضان ہو۔اس پر بنوخزاعہ کے ایک آدمی نے کہا کہ اے اللہ کے نبیؐ! ہمیں رمضان کے فضائل سے آگاہ کریں۔ چنانچہ آپؐ نے فرمایا یقیناً جنت کو رمضان کے لئے سال کے آغاز سے آخر تک مزیّن کیا جاتا ہے۔ پس جب رمضان کا پہلا دن ہوتا ہے تو عرش الٰہی کے نیچے ہوائیں چلتی ہیں۔
(الترغیب والترھیب کتاب الصوم الترغیب فی صیام رمضان احتساباً … حدیث 1498)

آنحضور صلی اللہ علیہ وسلم نے فرمایا:
جہنم کی آگ ان دوآنکھوں پر حرام ہے۔ اول وہ آنکھ جو خوفِ خدا میں آنسو بہاتی ہے اور دوم۔ وہ آنکھ جو راتوں کو جاگ کر اللہ تعالیٰ کے راستے میں پہرہ دیتی ہے ۔
(المستدرک کتاب الجہاد)

آنحضور صلی اللہ علیہ وسلم نے فرمایا کہ
ہر صبح انسان کے تمام اعضاء اُس کی زبان کی گوشمالی کرتے ہیں کہ دیکھ! ہمارے بارے میں اللہ تعالیٰ سے ڈر۔ ہم تو تمہارے ساتھ ہیں تو سیدھی رہی تو ہم بھی سیدھے ہیں اوراگر تو ٹیڑھی ہو گئی تو ہم بھی ٹیڑھے ہوں گے ۔
(ریاض الصالحین باب تحریم انعیبۃ والامر بحفظ اللسان)

آنحضرت صلی اللہ علیہ وسلم سے ایک دفعہ پوچھا گیا کہ کون سی ہجرت افضل ہے تو آپؐ نے فرمایا
مَنْ ہَجَرَ مَاحَرَّمَ اللّٰہُ عَلَیْہِ
(سنن ابوداؤد جلد اول کتاب الصلوٰۃ)
کہ جن باتوں کو اللہ تعالیٰ نے حرام قرار دیا ہے ان کو چھوڑ دینا۔

اللہ تعالیٰ قرآنِ کریم میں فرماتا ہے۔
ذٰلِکَ الۡکِتٰبُ لَا رَیۡبَ ۚۖۛ فِیۡہِ ۚۛ ہُدًی لِّلۡمُتَّقِیۡنَ (البقرہ:3)
یہ (کامل) کتاب ہے ، نہیں کوئی شک جس میں، ہدایت ہے متقیوں کے لیے۔

آنحضرت صلی اللہ علیہ وسلم فرماتے ہیں کہ
’’ماہ رمضان کے استقبال کے لئے یقیناًسارا سال جنت سجائی جاتی ہے اور جب رمضان آتا ہے تو جنت کہتی ہے کہ یا اللہ! اِس مہینے میں اپنے بندوں کو میرے لئے خاص.کردے۔ ‘‘
(بیہقی شعب الایمان)

حضرت مسیح موعود علیہ ا لسلام فرماتے ہیں کہ:
’’پس مبارک وہ جو خدا کے لئے اپنے نفس سے جنگ کرتے ہیں اور بد بخت وہ جو اپنے نفس کے لئے خدا سے جنگ کر رہے ہیں اور اس سے موافقت نہیں کرتے جو شخص اپنے نفس کے لئے خدا کے حکم کو ٹالتا ہے وہ آسمان میں ہر گز داخل نہیں ہو گا۔‘‘
(کشتی نوح، روحانی خزائن جلد19 صفحہ25(

اللہ تعالیٰ قرآنِ کریم میں فرماتا ہے :
وَمَا خَلَقۡتُ الۡجِنَّ وَالۡاِنۡسَ اِلَّا لِیَعۡبُدُوۡنِ ( الذّٰاریات:57)
کہ مَیں نے جنّ و انس کو پیدا نہیں کیا مگر اس غرض سے کہ وہ میری عبادت کریں۔

حضرت خلیفۃ المسیح الاول رضی اللہ عنہ فرماتے ہیں:
’’اس میں ایک عجیب سِرّ یہ ہے کہ یہ مہینہ آغاز سن ہجری سے نواں مہینہ ہے یعنی 1۔محرم 2۔ صفر 3۔ ربیع الاول 4۔ ربیع الثانی 5۔جمادی الاول 6۔ جمادی الثانی 7۔رجب 8۔ شعبان 9۔ رمضان اور یہ ظاہر ہے کہ انسان کی تکمیل جسمانی شِکمِ مادر میں نو ماہ میں ہی ہوتی ہے اور عدد نو کا ، فی نفسہٖ بھی ایک ایسا کامل عدد ہے کہ باقی اعداد اس کے احاد سے مرکب ہوتے چلے جاتے ہیں، لاغیر۔ اِس میں اشارہ اس امر کی طرف ہوا کہ انسان کی روحانی تکمیل بھی اِسی نویں مہینے رمضان ہی میں ہونی چاہئے اور وہ بھی اس تدریج کے ساتھ کہ آغاز شہود ہجری سے ہر ایک ماہ میں ایامِ بِیض وغیرہ( وہ روزے جو ہر قمری مہینے کی تیرہویں، چودہویں اور پندرہویں کو رکھے جائیں کیونکہ بِیض، سفیدی کو کہتے ہیں جب چاند اپنی پورے جوبن پر ہو کر سفیدی اور چمک بکھیر رہا ہوتا ہے۔ ناقل) کے روزے رکھنے سے بتدریج تصفیۂ قلب حاصل ہوتارہا‘‘
(خطبات نور صفحہ231)

اللہ تعالیٰ قرآن کریم میں فرماتا ہے:
یٰۤاَیُّہَا الَّذِیۡنَ اٰمَنُوۡا کُتِبَ عَلَیۡکُمُ الصِّیَامُ کَمَا کُتِبَ عَلَی الَّذِیۡنَ مِنۡ قَبۡلِکُمۡ لَعَلَّکُمۡ تَتَّقُوۡنَ (البقرہ:184)
اے وہ لوگو جو ایمان لائے ہو! تم پر روزے اسی طرح فرض کردئیے گئے ہیں جس طرح تم سے پہلے لوگوں پر فرض کئے گئے تھے تاکہ تم تقویٰ اختیار کرو۔