حضرت مسیح موعودؑ کی بعض احباب کو خصوصی دعاؤں کی ترغیب
حضرت مسیح موعود علیہ السلام فرماتے ہیں :
رات کے آخری پہر میں اُٹھو اور وضوکرو اور چند دوگانہ اخلاص سے بجالاؤ اور دردمندی اور عاجزی سے یہ دعا کرو۔
”اے میرے محسن اور میرے خدا! مَیں ایک تیرا ناکارہ بندہ پُرمعصیت اور پُر غفلت ہوں۔ تو نے مجھ سے ظلم پر ظلم دیکھا اور انعام پرانعام کیا اور گناہ پر گناہ دیکھا اور احسان پر احسان کیا۔ تو نے ہمیشہ میری پردہ پوشی کی اور اپنی بے شمار نعمتوں سے مجھے متمتع کیا۔ سو اب بھی مجھ نالائق اور پرگناہ پر رحم کر اور میری بے باکی اور ناسپاسی کو معاف فرما اور مجھ کو میرے اس غم سے نجات بخش کہ بجز تیرے اورکوئی چارہ گر نہیں۔آمین! ثم آمین۔“
(مکتوبات احمدیہ جلد5مکتوب نمبر2صفحہ3)
