طلوع ِہلال

رمضان کے معانی تپش اور گرمائش کے ہیں ۔ایک روزے دار کو یہ گرمائش مادی اور روحانی دونوں طریق پر حاصل ہورہی ہوتی ہے۔ مادی اس لحاظ سے کہ بھوکا رہنے سے روزے دار کے اندر گرمی پیدا ہوتی ہے۔ ہم نے دیکھا ہے کہ گرمی کے روزوں میں روزے دار کو اپنے جسم پر ٹھنڈا پانی ڈالنے سے سکون ملتا ہے اور روزہ افطار کرتے اِس گرمی کو مارنے کے لئے ٹھنڈے مشروبات کا استعمال کیا جاتا ہے  اور روحانی گرمائش اِن معنوں میں کہ روزہ ایک ایسا ماحول پیدا  کرتا ہے جس سے اللہ سے لگاؤ میں تیزی آتی ہے اور تسبیح و تحمید اور تذکیر کثرت سے کرنے سے پیارے رسول حضرت محمد مصطفیٰ صلی اللہ علیہ وسلم سے روحانی تعلق بڑھانے میں مدد مل رہی ہوتی ہے اور اِس رسولؐ (فداہ ابی وامی ) پر درود پڑھنے اور بھیجنے میں اضافہ ہوتا ہے۔ اِس عرصہ میں خطباتِ جمعہ،درس و تدریس اور دینی مطالعہ بھی روزے دار کے اندر  تپش اور گرمائش پیدا کرنے میں مددگار ثابت ہوتے ہیں ۔

حضرت مسیحِ موعودؑ فرماتے ہیں کہ

’’رمض سورج کی تپش کو کہتے ہیں۔ رمضان میں چونکہ انسان اَکل وشُرب اور تمام جسمانی لذّتوں پر صبر کرتا ہے۔ دوسرے اللہ تعالیٰ کے احکام کے لئے ایک حرارت اور جوش پیدا کرتا ہے۔ رُوحانی اور جسمانی حرارت اور تپش مِل کر رمضان ہوا۔ ‘‘

( ملفوظات جلد 1 صفحہ 309۔ 310)

ادارہ ”مشاہدات “ اپنے روزے دار قارئین کے لئے درس و تدریس اور تقاریر کا سلسلہ جاری کئے ہوئے ہے جو لازماً روزے داروں کے لیے روحانی حرارت کا مُوجب  ہوتا ہے۔

آنحضور صلی اللہ علیہ وسلم    فرماتے ہیں کہ ماہ رمضان کے استقبال کے لئے سارا سال جنت سجائی جاتی ہے اور جب رمضان آتا ہے تو جنت کہتی ہے کہ اے اللہ! اس مہینے میں اپنے بندوں کو میرے لئے خاص کردے۔

(سنن بیہقی شعب الإیمان فضائل شہر رمضان باب الجنۃ تزین من الحول إلی الحول لشہر رمضان)

اِس جنت کی تیاری اللہ تعالیٰ قمری سال کے آغاز سے ہی شروع کر دیتا ہے اور ہم معاشرے میں دیکھتے بھی ہیں کہ اللہ والے لوگ ایک رمضان کے اختتام پر اگلے رمضان کی باتیں کرتے نظر آتے ہیں۔ اِسی لیے کہتے ہیں کہ دو رمضان کو ایک پُل ملا رہا ہوتا ہے جس پر مومن سارا سال سفر کر کے اگلے رمضان میں داخل ہوتا ہے۔ اگر اللہ تعالیٰ ایک رمضان کے لیے شروع سال سے جنت سجاتا ہے تو ایک مومن بھی اگلے رمضان میں باسلامت داخل ہونے کے لیے اپنے آپ کو مادی اور روحانی لحاظ سے صحت مند  رکھتا ہے۔ ادارہ ”مشاہدات “ نے 2024ء کے رمضان کے بعد 2025ء کے رمضان کے دروس  اور تقاریر کے لیے نہ صرف عناوین  اکٹھے کرنے شروع کر دیئے تھے بلکہ جہاں کہیں بھی علمی مواد نظروں سے گزرا۔  اِس کو ایک فائل میں جمع کیا گیا۔ یہی دراصل 2025 ء کے رمضان کے لیے ادارہ ”مشاہدات“ کی طرف سے اپنے قارئین کے لیے ایک ایسی  تیاری تھی جو سارا سال جاری رہی تا ہمارے پیارے قارئین  اِن کو پڑھ کر اپنے اندر روحانی حرارت پیدا کریں اور جنت کے دروازے وا کریں ۔ اللہ تعالیٰ امسال ادارہ ”مشاہدات“ کو 30 دروس اور 30 تقایر بابت رمضان المبارک کی اشاعت کی توفیق دے رہا ہے۔ اَللّٰهُمَّ بَارِكْ لَنَا  وَ لِقَارِئِیْنِنَا

اِس علمی مائدہ  کو آپ تک پہنچانے میں  جن احباب و خواتین کا  تعاون حاصل رہا اُن  کے نام بغرض دعا تحریرہیں۔ مکرمہ عائشہ چوہدری  صاحبہ(جرمنی)، مکرم حافظ عبدالحمید صاحب، مکرم  زاہد محمود صاحب  ، مکرم عامر محمود صاحب (یوکے)،مکرم سعید الدین احمد صاحب (واقف زندگی۔یوکے) ، مکرم فضل عمر شاہد صاحب(لٹویا)، مکرم منہاس محمود صاحب(جرمنی)،مکرمہ عطیۃُ العلیم صاحبہ(ہالینڈ)، مکرمہ فائقہ بشریٰ صاحبہ نیز وہ تمام  جن کے مضامین سے ان تقاریر کی تیاری میں مدد لی گئی۔  فجزاہم  اللّٰہ تعالیٰ خیراً وکان اللّٰہ معہم

 مَیں یہاں قارئینِ کرام کا بھی شکریہ ادا کرتا ہوں جن کے ذوق و شوق  کی بدولت ”مشاہدات“ کے قارئین اور ویب سائٹ وزٹ کرنے والوں کی تعداد میں بڑی تیزی سے نمایاں اضافہ ہو رہا ہے۔ اللہ تعالیٰ ان تمام کو جزائے خَیْر دے اور قارئین کے لیے ہماری محنت کے میٹھے پھل لگیں۔آمین

قارئین ”مشاہدات“ میں سے  مکرم منور علی شاہد۔ جرمنی سے تحریر کرتے ہیں:

”مشاہدات کے عنوان سے آپ نے ایک غیر معمولی علمی و قلمی کام کردیا ہے ۔ “

مکرم عثمان مسعود احمد نے سویڈن سے تحریر کیا کہ

”مشاہدات کے تحت آپ نے قریباً ہر اہم موضوع پر مواد اکٹھا کر کے ہم سب کے لئے سہولت مہیا کردی.ہے“

اور امریکہ سے مشاہدات کی باقاعدگی سے ایک قاری مکرمہ امۃ الباری ناصر صاحبہ نے خاندانِ حضرت مسیح موعود علیہ السلام کے 115  افراد کی سیرت و شمائل پر دو جلدوں میں مواد اکٹھا ہونے پر مجھے لکھا کہ

” پہلی دفعہ اِس طرح لکھا گیا ہے“

یہ ”مشاہدات“ کے  سلسلہ کی   20ویں  کتابی کاوش ہے۔ رَبَّنَا تَقَبَّلۡ مِنَّا ؕ اِنَّکَ اَنۡتَ السَّمِیۡعُ الۡعَلِیۡمُ

۔۔۔۔خاکسار

۔۔۔ابوسعیدحنیف احمد محمود۔ برطانیہ

۔۔۔۔       ( شاہد۔ عربی فاضل)

۔۔۔ مربّی سلسلہ

(سابق ایڈیٹر روز نامہ الفضل  ربوہ و الفضل آن لائن لندن و نائب ناظر اصلاح و ارشاد مرکزیہ)

25؍فروری 2025ء

ویب سائیٹ:             www.mushahedat.com

فون نمبر:                  +44 73 7615 9966

---

انڈیکس

نمبر شمار	مشاہدات	عنوان	صفحہ
1	698	رمضان کی تیاری اسوہ. رسولؐ کی روشنی میں	1
2	699	تعلق باللہ کی اہمیت اور برکات	9
3	700	دنیا میں رہنے کے لئے رُوح و صحت افزاء مقام”اپنی اَوقات“	17
4	701	نماز،دعا ہی کا نام ہے	24
5	703	صبر بھی ایک عبادت ہے      ( صبر اور عبادت ، رمضان کی دو خوبصورتیاں ہیں)	32
6	705	رمضان میں روحانی پیدائش اور روحانی اولاد	42
7	707	رمضان اور اصلاح و تطہیرِ نفس	49
8	709	قرآنِ کریم   ”  ھُدًی  لِّلْمُتَّقِیْن “	57
9	711	آدابِ گفتگو	65
10	713	رمضان اور روحانی موسمِ بہار	73
11	715	اللہ ہمارا بہترین دوست ہے	79
12	717	رمضان اور ذَائِقَۃُ الْمَوْتِ	84
13	719	رمضان اور سریّہ عبداللہ بن عتیک	93
14	721	رمضان میں ہونے والی  دو بابرکت شادیاں	100
15	723	رمضان اور مَنْ. کا مَنکا صاف کر	108
16	725	رمضان اور کسوف و خسوف کا نشان	115
17	727	کَتَبَ اللّٰہُ لَأَغْلِبَنَّ أَنَا وَرُسُلِیْ	126
18	729	رمضان اور خدمت و اطاعت والدین	134
19	731	رمضان  میں  رحمت ، مغفرت و بخشش کی مناسبت سے چند دعائیں	149
20	733	رمضان اور غزوہِ بدر	161
21	735	اَلْوَلَدُ سِرٌّ لِاَبِیْہِ	168
22	737	اسلام میں عورت کا مقام	176
23	739	رمضان اور فتح مکہ	186
24	741	رمضان کی اہمیت ، مثالوں سے( تقریر نمبر 1)	194
25	743	رمضان کی اہمیت ، مثالوں سے( تقریر نمبر 2)	202
26	747	ذکرِ الٰہی، اطمینانِ قلب کا مُوجب ہے	210
27	749	رمضان کے روزوں سے متعلقہ چند مسائل	218
28	751	حضرت خلیفۃُ المسیح الرابعؒ کے فتاویٰ  بابت روزے	227
29	753	اَلصَّلٰوۃُ عِمَادُ الدِّیْن	240
30	776	ایمان بالغیب کیوں ضروری ہے؟	248

مکمل کتاب پڑھنے کے لئے ٹائٹل پیج پر کلک کیجئے